الخميس، 28 مايو 2009

استماره بخمسه وسبعين - قصه قصيره


انا استماره بطاقه رقم قومى بس من الغالى بخمسه وسبعين جنيه لونى اخضر...قصتى بتبتدى من اول ماكنت ورقه ماسواش شلن بقدرة قادر بقيت اساوى كتير طالعه من المطبعه فرحانه بلونى الاخضر وبتمنى الغالى بس كل ده مش مهم انا قصة حياتى القصيره بتبتدى لما حد يشترينى ويحررنى من حبسة الخزنه وريحة الفلوس القديمه
واخيرا انفتح باب الخزنه وجه دورى اخيرا الحريه ومع اول ضوء دخل الفضول غلبنى اشوف مين هيشترينى...ودى كانت أول صدمه..اصل اللى كان فى خيالى ان كل اللى بيشترى استماره بخمسه وسبعين غنى وظروفه مرتاحه لكن الواقع غير كده خالص اغلب اللى بيشترى استماره ب75 غلابه وعلى قد حالهم زى صابر
طبعا اكيد عرفتوا مين صابر...شاب اسمر مش مهم شكله لانه واحد من ملايين يمكن يكون جارك او اخوك اوصديقك هو شبههم وشبهك والهم اللى شايله زى همهم وهمك ..لكن رغم انى كنت اتمنى يشترينى حد غيره ظروفه احسن لكن ماعرفش ليه تعاطفت معاه وتمنيت اسعده لما اتحول من استماره لبطاقه واصبح كل همى هو صابر..مسكنى صابر بايده وعينه بتلقى بنظرة وداع على الخمسه وسبعين جنيه اللى اختفت فى الخزنه الضلمه
ماحدش عارف هى رايحه فين حتى الموظف اللى اخدها من صابر مايعرفش مصيرها وماحدش بيقول ويمكن ماحدش سأل..
مسك صابر قلمه وبدأ يكتب بياناته بحرص شديد كأنه فى لجنة امتحان اسئلته السهله جدا خايف يجاوب عليها.رغم ان السؤال هو اسمك لكن القلم خايف يجاوب خايف يكتب خانه غلط تبوظ الاستماره وتضيع الفلوس ..ما اصعبه امتحان.. لكن صابر طول عمره مجتهد وذكى ومتفوق موس مذاكره زى مابيقولوا ومعاه شهاده عاليه. بدا يكتب اسمه صابر واسم ابوه راضى جنسيته مصرى تاريخ ميلاده لسه فى عز شبابه عود اخضر طاقه منتجه عنوانه جيراننا . طبعا الحاله الاجتماعيه اعزب... اما المهنه هى اللى حيرتنى عايز يكتب عامل اجرى !! والله صعبان على يا صابر وصعبان علي تعبك وسهرك الليالى فى المذاكره ودعوات اهلك بالنجاح عملتلك ايه الشهاده اخرتها عامل اجرى! بس كله يهون علشان لقمة العيش .
خلاص صابر كتب كل البيانات المطلوبه بدقه بس اللى محيرنى لغاية دلوقتى نظرة صابر مش مبسوط بس مش زعلان. ماعندوش امل بس مش يائس باختصار تقدروا تقولوا عليه صابربس مش راضى
اصل صابر عقبال عندكم جميعا جايله عقد عمل فى دوله عربيه يشتغل عامل اجرى وباع اللى وراه واللى قدامه علشان يجيب العقد.... بس هو كان نفسه يشتغل فى بلده بفلوس قليله مش مشكله بس يشتغل المهنه اللى بيحبها واللى علشانها ذاكر وتعب واخد بكالوريوس التربيه كان نفسه يشتغل مدرس تاريخ
الطابور طويل الدنيا حر واخيرا وصل صابر للموظف اللى استلم منه الاستماره حسيت ان دى لحظة الفراق هتبتدى رحلتى بس من غير صابر بس اللى مصبرنى ان صابر وهو ماشى اخد حته منى مكتوب عليها ايصال استلام لسه فيه حاجه بتربطنى بيه ...مشى صابر والموظف حطنى وسط كوم استمارات كلهم اعرفهم كنا مع بعض فى خزنه واحده تقريبا كلنا دفعه واحده شبه بعض بس اختلفنا لما باعونا كل واحده مننا شايله هم غير اختها وبيانات مختلفه الشبه الوحيد اللى فاضل بيننا ان كلنا محبطين من اللى شوفناه كلنا صعبان علينا اللى اشترانا كلنا بنتمنى نتحول بطاقه باقصى سرعه وده حقنا لاننا استمارات مستعجله ...بس مستعجله على ايه....ده اول تعليق سمعته من اول موظف مسك مجموعة الاستمارات وقال لزميله خد دى استمارات مستعجله هو قالها على انها دعابه بس احنا مستعجلين على مصالح اصحابنا ومهمومين بهمهم تعرف ياصابر كان المفروض يسمونا استمارات مهمه لان اسم مستعجله مش بيثير اهتمام الموظف لان احنا فعلا استمارات مهمه.. مصير ناس كتير متعلق بينا تعرف كمان المفروض يسمونا استمارات غاليه لان تمنا غالى جدا بالنسبه للفئه اللى بتشترينا
تمنا بيمثل ثروه بالنسبه للغلابه اللى زى حالاتك....انت تعرف رغم كل ده بيسمونا ايه ؟ استمارات خضرا...... احنا المفروض نطالب بتغيير اسمنا يسمونا استماره مهمه مستعجله غاليه مهمومه

4 رايك يهمنا:

mony يقول...

انت فرحانه بنفسك قوى .
فيه اللى اغلى منك ب 100 جنيه بس لونها رمادى ومصيرها هيبقى زيك وكلكم فى النهايه زى بعض الاصفر والازرق والاخضر .كلكم مهمين ومصير ناس بس الفرق فى العبيط اللى بيشترى الغالى ال يعنى تمنه فيه.وعجبى

hayoomaa يقول...

تعيقبا عالتعليق اللي فات
انا كنت من ضمن العبيط اللي اشتري ب75
واكتشفت انها لا مستعجله ولا حاجه
طلعت البطاقه بعديها ب3 ايام
والاكتشاف اللي خضني بجد انه بطاقه الرقم القومي اللي طلعتها ليه ميعاد محدد يعني مش زي التانيه
مع اني دافعه فلوس
بس نعمل ايه
الحكومه اكبر مننا سننا وعارفه طبعا اكتر مننا
وعجبي يامتولي...!

mira يقول...

انت زعلان اوى علشان بطاقه هاتدفع فيها 75 جنيه وايه يعنى عادى على الاقل دى هاتدفعهم كل كام سنه زى ماحددوا انها المفروض تتغير كل كام سنه صح.. يا سيدى والله دى عادى الغير عادى والمقلق واللى يضايق بجد ان فى حاجات كتير غاليه والمفروض ان احنا بنستعملها كتير وتقريبا احتياجنا ليها يوميا هيا دى اللى المفروض نعترض عليها ونتكلم يمكن يسمعونا بس انا متاكدة انهم سدين ودانهم عن اى اصوات بتعترض على اى شئ لانه مش من حقنا نعترض على شئ مفهوم الكلام دة ولا ايه
عيش حياتك زى ما الحكومه عايزة واطلب من ربنا يصبرنا عليهم ويهونها علينا
دمت بكل خير

micheal يقول...

عمرنا ما حنتحرك خطوة لقدام طالما أبسط الأمور عندنا ماشية بالشكل ده