الجمعة، 12 فبراير 2010

الاربعين


شكر وزكرى الاربعين

لكل قلب معانا حزين

وكل دمع فى اى عين

مسيحيين او مسلمين

كل فلاح فى بلادى

عارف قيمة الضنا والطين

كل صعيدى بطول الوادى

فاهم اصل العله فى مين

عارف ان فى نجع حمادى

كلب اتسعر من سنين

اصبح غول للكل يعادى

كرشه اتعبى بنى ادمين

ياحضرات المجتمعين

تحت القبه ومش داريين

فى زفاف الوالى متناقشين

وعن مصايبنا متغافلين

فات ايام وشهور قاسيين

لما وصلنا الاربعين

وانتوا فى سابع نومه غاطسين

.

13 رايك يهمنا:

rony يقول...

طبعا لازم يكونوا غاطسين
لما تبقى غلاوتهم فى غلاوة ابن فلان او علان
يبقى الكل لازم يهتم من اكبر واحد لاصغرهم
ولما يبطلوا كلام عن الماتش والكاس يبقى برضه يهتموا
لما يحسوا بالظلم من اى حد ويكون ظلم كبييييييييييير
يبقى يحسوا بظلم اللى اتعرض له الاولاد دول
ولما تجيلهم نفس نار الفراق واللى فى قلب كل اب وام واخ واخت انطفت شمعة بيتهم يبقى يحسوا ساعتها بنارهم

بس الشمعه لسه ما انطفتش
هتفضل والعه وعمرها ما هتنطفى
ربنا يقدر يعصب جراح اهاليهم ويطفى نار قلوبهم وياخد حقهم وحق كل مظلوم على ارض البلد دى
ربنا يرحمهم ويرحمنا
ارجو ان تذكرونى يا اخوتى امام عرش النعمه

ربنا موجود

Ms Venus يقول...

اللى ميقدرش عليه البشر يقدر عليه ربنا


عمر دماءنا ما هتقول لا مهما تسيل و يغيب الحق . هو الظلم امتى هزمنا ولا العالم يوم لنا رق

ربنا موجود


شهداء الميلاد

اذكرونا يا اخواتنا امام عرش النعمة

Mona يقول...

ربنا يحرمهم جميعا

sweet angel يقول...

ربنا يرحمهم

mony يقول...

صعبان عليا قوى يالاسع
دفنتك بين الدفاتر
بدعيلك ربنا يطلعك على وش االدنيا
وتعمل ديوان جميل زى كلامك
وجعت قلبى زياده ماهو موجوع

يوم ما اندبح ابانوب وجرجس ومرقس ودميانه كان يوم عصيب
لكن دلوقتى بقى عيد القديس ابانوب
ومار جرجس وغيرهم كتير

ربنا يرحمهم ويصبر اهاليهم
ويرفع الظلم عن كل مظلوم
وربنا يهدى علينا رؤسائنا
ويديهم الحكمه فى الحكم

!!! عارفة ... مش عارف ليه يقول...

البوست ده تقيل اوووي

هتصدقني لو قولتلك

إني وانا بقرا كلامك

حسيت بروح سيد حجاب في كلامك

أنت مهووووب بجد

ربنا يوفقك للخير


وليد

Desert cat يقول...

وجعت قلبى اكتر ماهو موجوع
الله يرحمهم

Tears يقول...

ربنا يرحمهم و يرحمنا من تحالف طيور الظلام مع الاستبداد لان هذا قد يقودنا لما لا تحمد عقباه

تحياتي

فشكووول يقول...

يا اخى الراجل دا بلغ من العمر ارزله واكبر منى بييجى كدا 20 سنه وواكل الدنيا فى بطنه وكرشه كبير ووشه مكشر ويقطع الخميره من البيت . طبعا لانه امنا الغوله شكله يسد النفس

ربنا يريحنا من الاشكال دى

قيس بن الملووووح يقول...

نحن في حاجه الي كل راي حكيم في مشاكل اصدقاء مدونة "دقات قلب بعد الخمسين"

rovy يقول...

ربنا يرحمهم جميعا يارب ..

micheal يقول...

تسلم إيدك ودماغك اللي بتجيب اللسعات دي...كلامك جميل جدا رغم انه بيتكلم في مناسبة موت
!!
تحياتي

فشكووول يقول...

يا لاسع افندى مش عارف ايه اللى حصل
انا قلت اتراخم واشترك عند لاسع افندى قوم الكمبيوتر جاب صورتى مرتين .. انت بقى حتعرف تتصرف وتعالج الخطأ اللى انا عملته ومش عارف اصلحه تانى
تحياتى