الخميس، 30 يوليو، 2009

استماره بخمسه وسبعين - قصه قصيره

انا استماره بطاقه رقم قومى بس من الغالى بخمسه وسبعين جنيه لونى اخضر...قصتى بتبتدى من اول ماكنت ورقه ماسواش شلن بقدرة قادر بقيت اساوى كتير طالعه من المطبعه فرحانه بلونى الاخضر وبتمنى الغالى بس كل ده مش مهم انا قصة حياتى القصيره بتبتدى لما حد يشترينى ويحررنى من حبسة الخزنه وريحة الفلوس القديمهواخيرا انفتح باب الخزنه وجه دورى اخيرا الحريه ومع اول ضوء دخل الفضول غلبنى اشوف مين هيشترينى...ودى كانت أول صدمه..اصل اللى كان فى خيالى ان كل اللى بيشترى استماره بخمسه وسبعين غنى وظروفه مرتاحه لكن الواقع غير كده خالص اغلب اللى بيشترى استماره ب75 غلابه وعلى قد حالهم زى صابرطبعا اكيد عرفتوا مين صابر...شاب اسمر مش مهم شكله لانه واحد من ملايين يمكن يكون جارك او اخوك اوصديقك هو شبههم وشبهك والهم اللى شايله زى همهم وهمك ..لكن رغم انى كنت اتمنى يشترينى حد غيره ظروفه احسن لكن ماعرفش ليه تعاطفت معاه وتمنيت اسعده لما اتحول من استماره لبطاقه واصبح كل همى هو صابر..مسكنى صابر بايده وعينه بتلقى بنظرة وداع على الخمسه وسبعين جنيه اللى اختفت فى الخزنه الضلمهماحدش عارف هى رايحه فين حتى الموظف اللى اخدها من صابر مايعرفش مصيرها وماحدش بيقول ويمكن ماحدش سأل..مسك صابر قلمه وبدأ يكتب بياناته بحرص شديد كأنه فى لجنة امتحان اسئلته السهله جدا خايف يجاوب عليها.رغم ان السؤال هو اسمك لكن القلم خايف يجاوب خايف يكتب خانه غلط تبوظ الاستماره وتضيع الفلوس ..ما اصعبه امتحان.. لكن صابر طول عمره مجتهد وذكى ومتفوق موس مذاكره زى مابيقولوا ومعاه شهاده عاليه. بدا يكتب اسمه صابر واسم ابوه راضى جنسيته مصرى تاريخ ميلاده لسه فى عز شبابه عود اخضر طاقه منتجه عنوانه جيراننا . طبعا الحاله الاجتماعيه اعزب... اما المهنه هى اللى حيرتنى عايز يكتب عامل اجرى !! والله صعبان على يا صابر وصعبان علي تعبك وسهرك الليالى فى المذاكره ودعوات اهلك بالنجاح عملتلك ايه الشهاده اخرتها عامل اجرى! بس كله يهون علشان لقمة العيش .خلاص صابر كتب كل البيانات المطلوبه بدقه بس اللى محيرنى لغاية دلوقتى نظرة صابر مش مبسوط بس مش زعلان. ماعندوش امل بس مش يائس باختصار تقدروا تقولوا عليه صابربس مش راضىاصل صابر عقبال عندكم جميعا جايله عقد عمل فى دوله عربيه يشتغل عامل اجرى وباع اللى وراه واللى قدامه علشان يجيب العقد.... بس هو كان نفسه يشتغل فى بلده بفلوس قليله مش مشكله بس يشتغل المهنه اللى بيحبها واللى علشانها ذاكر وتعب واخد بكالوريوس التربيه كان نفسه يشتغل مدرس تاريخالطابور طويل الدنيا حر واخيرا وصل صابر للموظف اللى استلم منه الاستماره حسيت ان دى لحظة الفراق هتبتدى رحلتى بس من غير صابر بس اللى مصبرنى ان صابر وهو ماشى اخد حته منى مكتوب عليها ايصال استلام لسه فيه حاجه بتربطنى بيه ...مشى صابر والموظف حطنى وسط كوم استمارات كلهم اعرفهم كنا مع بعض فى خزنه واحده تقريبا كلنا دفعه واحده شبه بعض بس اختلفنا لما باعونا كل واحده مننا شايله هم غير اختها وبيانات مختلفه الشبه الوحيد اللى فاضل بيننا ان كلنا محبطين من اللى شوفناه كلنا صعبان علينا اللى اشترانا كلنا بنتمنى نتحول بطاقه باقصى سرعه وده حقنا لاننا استمارات مستعجله ...بس مستعجله على ايه....ده اول تعليق سمعته من اول موظف مسك مجموعة الاستمارات وقال لزميله خد دى استمارات مستعجله هو قالها على انها دعابه بس احنا مستعجلين على مصالح اصحابنا ومهمومين بهمهم تعرف ياصابر كان المفروض يسمونا استمارات مهمه لان اسم مستعجله مش بيثير اهتمام الموظف لان احنا فعلا استمارات مهمه.. مصير ناس كتير متعلق بينا تعرف كمان المفروض يسمونا استمارات غاليه لان تمنا غالى جدا بالنسبه للفئه اللى بتشتريناتمنا بيمثل ثروه بالنسبه للغلابه اللى زى حالاتك....انت تعرف رغم كل ده بيسمونا ايه ؟ استمارات خضرا...... احنا المفروض نطالب بتغيير اسمنا يسمونا استماره مهمه مستعجله غاليه مهمومه

12 رايك يهمنا:

عاشقة الأحزان يقول...

اخد اول تعليق ونعود بعد الفاصل


عااااااااااااااااااااااااااااا

عاشقة الأحزان يقول...

تعرف بجد هى دى فعلا حيتنا شوية ورق واستمارات البنى ادام مننا مش غير شوية ورق وبصمه ودمغه

ياااااااااااه احنا رخاص قوووووووووى
تحياتى

Mona يقول...

بجد حاجة تحزن ربنا يهونها على الناس جميعا ولاحول ولاقوة الا بالله

mony يقول...

مره كانوا ناس مستعجلين
على بطاقه ابوهم
رغم انها مش خضرا
ومش غاليه
عارفين لييييييه




عشان الراجل مات وعاوزين يدفنوه



ملحوظه:
دى حقيقه مش نكته

بزنس تعيش يقول...

نيللى قالتها زمان فى الفوازير




عالم ورق

عالم ورق

عالم ورق

----------------------------
مع تحياتى / حازم ربيع

فشكووول يقول...

متهيأ لى الموضوع لسع قوى

عارف ان احنا بندفع فلوس كتيره قوى ثمن لورق ما لوش اى لازمه مع ان بياناتنا مسجله فى السجل المدنى والشهر العقارى والجيش والمدرسه والشغل وكل حاجه بس طبعا لازم نجيب ورق وندفع فيه فلوس ودمغه والذى منه امال يعنى الحكومه تلم فلوس من مين

امشى بقى عشان مخى حيلسع هو كمان

♥ Am fOpa'D ♥ يقول...

يا عيني عليك يا صاابر وانت بتودع الاستمارة الخضرا بعينيك وبالقلم

ويا عيني على الاستمارة وانتي غالية على النااس ومستعجلة :(

مستعجلة على ايه!!!

لا حول ولا قوة الا بالله

رمضان كريم

micheal يقول...

في إنتظار جديدك
كل سنة وأنت طيب

أسماء علي يقول...

عجبتني الفكرة جدا
و طريقة السرد
:)

دمت بمودة

micheal يقول...

عاوز جديد
:(

GiGi world يقول...

كل عام وانت بخير
تقبل الله

dina يقول...

البوست بجد جميل اوى و فكرته حلوة جدا و جديدة
انا تعاطفت مع صابر من كلام الاستمارة و فكرنى بناس كتييييييييير اعرفهم