الاثنين، 15 يونيو 2009

اسئله فى الجون


اسئله من واحد مبيفهمش فى الكوره خالص بس بيحب اى حاجه فيها اسم مصر

س : هى مصر فيها كام منتخب؟

س : يعنى المنتخب اللى لعب مع البرازيل هو نفس المنتخب اللى لعب مع الجزائر!!!

س : هو مين اقوى البرازيل ولا الجزائر؟

س : الجزائر فازت بكاس العالم كام مره؟

س : الجزائر فازت ببطولة افريقيا كام مره؟

س : البرازيل لو لعبت مع الجزائر مين هيغلب؟

س : البرازيل غلبتنا...الناس فرحانه ليه؟

طيب يكونش الجزائريين عاملينلنا عمل ورابطينه فى خف جمل

اخر سؤال

هو كاس العالم 2010 هيكون سنة كام؟؟؟؟؟

20 رايك يهمنا:

عاشقة الأحزان يقول...

السلام عليكم


انا جايا اعلق وخلاص

بس بجد
ماليش
فى الكورة
المهم سبت حضور


هههههههههههههه

تحياتى
انوسه

لاسع افندى يقول...

عاشقة الأحزان

حمدالله على سلامتك ونورتى التدوين وربنا مايحرمنا من مرورك وتعليقك

سلاموز

أحمـــــــــــــد أبو العلا يقول...

هههههههههههه

واضح ان الموضوع مأثر معاك اوي
لا لا متسكتش على نفسك
كمادات ميه ساقعه وانت تبقى زي الفل الصبح ان شاء الله

معلش معلش
اصل كلنا زي معاليك كده
مش فاهمين حاجه ومش عارفين راسنا من كعب الجزمه

GiGi worled يقول...

والله اللى حصل النهارده فى الماتش الناس مش مصدقه نفسها
بس انا كان نفسي نغلب الجزائر اهم
عايزين نروح كاس العالم اللى حضرتك مش عارف امتى ده
عايزين نروحه وخلاص وياريت اللى هو بتاع 2010

ياترى هيبقى سنه كااااااااااااااااااام

غير معرف يقول...

كنت سايباكك الصبح كويس ايه اللى جرى..تلاقيك لعبت مع ميلو الوحش تحت الشمس واخدت ضربه شمس..سلامتك يالاسع ومتخفش مش هسيبك تانى مع ميلو الوحش.

Rooma Qandil يقول...

ههههههه....والله ليك حق تكتب كده وعجبي,,,
بس خير النااس ملهوفة على الماتش وتسيب الي قدامها والي وراها عشان تتفرج عليه قلنا انها ليها في الكورة
بس الناس فرحانة بالخسارة اكيد طبعا مش مصدقين نفسهم بالثلاث اجوان الي جم في البرازيل والفارق جوول
شعب غريب والله
بالنسبة للجزائر والبرازيل,,,معرفش والله على حد معلومااتي مفيش مقارنة بالنسبة للنتيجةومهارة اللعب في مقارنة بس يلا كله في الهوااا

تحياتي,,,

* Alwaan * يقول...

والله كنت ماشيه ساعه الماتش فى الشارع والشااارع فاضى الناس بتتفرج عالماتش بقى

وفجأه سمعت الله أكبر الله أكبر الله اكبر

مش وقت آذان يعنى

انا قلت احنا عبرنا بارليف تانى ولا ايه

اتارينا جبنا جووون

شعب فاضى والله


ربنا يهدى

ذو الوجه المبتسم يقول...

السلام عليكم
الاسئلة فى الجون بجد
لكن فيه نقطة مهمة
روح الانتماء للوطن مش بايدينا
لما تشوف الناس اللى اتفرجت على المباراة بمختلف مستوياتهم العلمية
وتشوف التصفيق والطيران من الفرح والنط والهيصة اكيد هتعرف ان مصر غالية علينا قووووى
الحكاية مش حكاية مباراة كرة قدم
فيه الاهم وهو حبنا لمصر

اجابات الاسئلة سهلة
وبلاش ترجعنا للماضي
خلينا نبص لقدام شوية

ذو الوجه المبتسم يقول...

السلام عليكم
الاسئلة فى الجون بجد
لكن فيه نقطة مهمة
روح الانتماء للوطن مش بايدينا
لما تشوف الناس اللى اتفرجت على المباراة بمختلف مستوياتهم العلمية
وتشوف التصفيق والطيران من الفرح والنط والهيصة اكيد هتعرف ان مصر غالية علينا قووووى
الحكاية مش حكاية مباراة كرة قدم
فيه الاهم وهو حبنا لمصر

اجابات الاسئلة سهلة
وبلاش ترجعنا للماضي
خلينا نبص لقدام شوية

انا ودماغي يقول...

ههههههههههههههههههههههههههههههه
ما بلاش نتكلم فى الماضى....الماضى ده كان كله جراح

الناس فرحت ليه مع اننا خسرنا...سؤال وجيه..لاننا كنا متوقعين الفضيحة ام جلاجل الخسلرة ام اربعة خمسة صفر ..فلما لا يحصل ده و لا ده يبقى كدة فلة ومش عايزين حاجة من الدنيا

اما بالنسبة لميعاد كاس العالم 2010 فأسال متخصص ..احنا غلابة زيك

shasha يقول...

هو ليه حبنا لمصر مش بيظهر غير فى تشجيع ماتشات الكورة !!

على باب الله يقول...

على رأي سواق الأتوبيس :

" كلمة السر هي ( طبق الكسكسي ) "

لو معندكش أي فكرة عن المؤامرة الكسكسية

تثقف من هنا :
http://www.aljarida.com/aljarida/Article.aspx?id=115357

عمرو وجيه يقول...

فعلا تناقض في الاداء

بس


مهما كان احنا ادانا بشكل ممتاز جدا


مش لازم نبص علي السلبيات

خلينا في اللي جي


نركز احسن في ماتش ايطاليا


موفقين ان شاء الله

micheal يقول...

ههههههههههههههههه...هي دي مصر يا باشا والمعدن النفيس بتاعها اللي بنسني ظهوره بعد ما القطر يكون اتحرك
لو حابب تتابع مواضيع رياضية في هذا الشأن اتفضل عندي في المدونة الرياضية
http://michaelsportszone.blogspot.com/
أو ضفني ع الفيس
michael mohsen youssef
سلام

dina يقول...

ههههههههه
اكتر تعليق عجبنى الناس مبسوطة ليه ان البرازيل كسبتنا....صحيح و الله احنا البلد الوحيدة اللى بتقول لبعض مبروك لما تتغلب:d
لا بس بصراحة المنتخب عامل شغل كويس اوى الفترة دى..كفاية التمثيل المشرف ادام احسن فرقتين تقريبا فى العالم....البرازيل و ايطاليا...و عقبال الباقى يا رب

ياسر سليم يقول...

دا انت زى حالاتى تمام

انا برضه ببقي عايز اسئل الأسئلة دى وبخاف لحد يتهمنى بالخيانة وعدم الولاء للفريق المصري وعدم فهم استراتيجيات اللعب الكروي

Ramy Wasel يقول...

مبروك الفوز على ايطاليا

وعقبال الصعود لكأس العالم

وعلى فكره

كأس العال بتاع جنوب افريقيا 2010
حيتلعب فى انجلترا سنه 2013

اى خدعه

يا مراكبي يقول...

ايه ده

ده توارد خواطر وافكار بقى

عموما الأسئلة رائعة جدا بجد .. ومش محتاجه اجابات .. هي بترد على نفسها .. بترد علينا وعلى عجائب شعبنا

Adam يقول...

علي فكره اسم المدونه جميل جدا

واسم لاسع افندي تحفه اختيار جميل وروش يا روش

تحياتي اللاسعه

غير معرف يقول...

هو فعلا كاس العالم 2010 هيكون سنة كام