الجمعة، 26 يونيو، 2009

مرتاح وانا تعبان

مرتاح وانا تعبان . لاني قريب من حضنه . واثق فيه ومش قلقان لان الحكمه في قربه . ممكن اكون تعبان ان ماختش اللي عايزه . لكن الاكيد اني مرتاح لاني واثق من عدله . طلبت كتير علشان ارتاح وكان بيتهيألي اني بطلب اللي طالبه . لكن بعد فترة مااختش طلبي اللي طلبته . زعلت اتخنقت مليت بكيت انهرت بس باردو مرتاح وانا تعبان لان واثق في حبه وهايختارلي من قلبه . بنزعل الاول منه . لانه ما ادناش اللي عايزينه . لكن هو شايف الاغلي والاحلي بس للاسف طولة باله هي اللي تعباني وتعبانا . هايديني اللي انا عايزه وابقي مرتاح وانا مرتاح . ولا هايحرمني منه ويديني غيرة واكون مرتاح وانا تعبان . لكن في نفس الوقت واثق ان هاكون مرتاح انما تعبي في اني ما نولتش اللي هاويته واتمنيته . علي طول قريب منا . بتسمعنا قبل ما تكلمنا . عارف اللي جوانا وبحنيتك بتداوي ألمنا وبتحيي ضمايرنا . نسيناك واحنا قاصدين . وانت مش ممكن تنساني لا صاحيين ولا نايمين . بنجوع ونعطش ونتعري .وانت بتكسينا وتشبعنا وتروينا . لانك حبيبنا اللي تاعبنا وخايف اكيد علينا . ما بنحسش بقيمتك غير لما بنقع في بلاوينا . رغم ان طول عمرك ما بتسيبنا وعينك دايما علينا . وحياتك بنحبك ومحتاجين اوي لقربك وحضنك . لو بعدنا عنك . ماتزعلش . اعرف بس ان دا من تعبنا منك . بس باردو بنحبك . وما يهمكش اتعبني كمان وكمان هانكون مرتاحين واحنا تعبانين .
علشان كدا مرتاح وانا تعبان

4 رايك يهمنا:

لاسع افندى يقول...

ماتسكتش على نفسك


تحياتى

الشعب لابد له من حكومه تشكمه يقول...

ياعينى دا انت حالتك صعبه:(وبترد على نفسك كمان.كده الموضوع كبر انا شايفه تروح تموت نفسك احسن.روستوك روستوك يازكى ياروستوك
نتكلم جد باه.
ربنا يفرج كربك ويريح قلبك وبالك ويقسملك الخير,واعرف ان مش هيجيلك الا الخير وان المنع ده رحمه ليك:)
انا عارفه ان مش واقته انى اقول الكلام ده وانك كاتب الكلام باحساسك بس علشان مشيلش ذنوب:( فى بعض الكلمات متصحش انها تتقال وتعتبر حرام بس كده .
اوعى تتعصب عليا وتطلع اللى فيك فيا.:)

رونى يقول...

كتير كنا بنتمنى حاجات وبنزعل لو ماجاتش ومكناش بنعرف ليه محصلش ونقول يمكن000 ويمكن000 لكن مبنعرفش انه مدبرلنا حاجات احسن !وافضل اقوله يا رب نفسى اعرف ليه وسؤالى يفضل كتير محيرنى ويمكن سنين لكنه ما بيسبنيش محتاره وبيجاوبنى فى الوقت اللى هو شايفه مناسب وساعتها برتاح ويرتاح قلبى ربنا معاك وكون مطمئن انك فى ايد امينه جداومش هيدبر لك غير الخير ربنا معاك

Crazy Sky يقول...

في جمل ماينفعش تكون قاصد بها ربنا في تدوينتك

اغلب الظن انك بترمى وبتلقح كلام على حد معين " استغر الله العظيم " وخصوصا ان اسم المدونة هموم مصرية

بلاش الكلام الكبير ده .... احنا غلابة اوى ياسيد