الخميس، 11 يونيو، 2009

خايف على بلدى


خايف عليكى يابلدى
تاخدى نزلة برد
خايف على اهلك
وشبابك اللى زى الورد
الجامعه الامريكيه
قفلوها...مش مهم
لكن مدننا الجامعيه
هى اللى مشيلانى الهم
دى فيها عيال الغلابه
ومين بيهم يهتم
طيب وقطر الصعيد
شايل كل يوم الوفات
لو واحد منهم عطس
هتلاقى الباقى مات
والمترو والاتوبيس
والتوك توك والمكرباصات
دى اللى شايله عيالنا
واخواتنا بدون كمامات
واخينا اللى فى الطابور شايفينه
بيشترى عيش من اللى عارفينه
لو يقدر على تمن الكمامه
كان اكل عيش فينو
خايف عليكى يابلدى
تروحى فى عطسه سلامات
والناس تعاير ولدى
ابوك اللى عطس مات

8 رايك يهمنا:

موناليزا يقول...

لك حق تخاف فشعبنا الجميل يتميز بالسلوك البدائى
==
ممكن تشيل تأكيد الكلمة حين ارسال التعليق

mony يقول...

لك الف حق المصريين عندهم اهمال شديد وبيقولوا عليه بساطه..تلقائيه..طيبه .بس هو عدم وعى وربنا يستر

Sweet Violet يقول...

ربنا يستر بجد ):

GiGi worled يقول...

روعه وبجد حسيت ان حضرتك خايق علىا لبلد قوي
بس ربنا يحمينا وان شاء الله ربنا هو اللى يعدينا من المحنه دى
لان الحسابت الماديه بتقول تلت الشعب بعد الشر هيموت لكن ربنا كريم انا متاكده انه خير

عمرو يقول...

الله ينور عليك و ربنا يستر بجد ..
أحيانا لما بأفكر فى سلوكياتنا بأشعر بالرعب لو لا قدر المولى الموضوع كبر أكتر من كده ..
تقبل تحياتى و تقديرى ..

بلاش فضايح يقول...

الخوف دة مرحلة وعدت من زمان
احنا دلوقت فى مرحلة اليأس

يائس منك يابلدى ومن اللى عملتيه فى شبابك وأهلك

تحياتى

Bola 7elmi يقول...

والناس تعاير ولدى
ابوك اللى عطس مات

ههههههههههههههههههههههههه
حال البلد يضحك والله
مهو لما تضحك وتفطس ضحك معناه انك وصلت لمرحله م بعد البكاء
وياعيني يا عيني ياعيني ع الولا

hayoomaa يقول...

عارف ايه اللي غايظني بجد وحارق دمي ومش طايقه نفسي من يوميها
كنت انا في المجمع اللي في التحرير بعمل ورقه كده عشان مسافره
لقيت ولاد اللذينه الحرس وشويه ناس واقفين كده بيوزعوا كمامات عالاجانب
مش عارفه بصراحه بفلوس ولا بغيره
بس بجد حاجه تفلق
يعني خلاص للدرجه مش فاهمين ان الوابء دا جايلنا منهم
يعني احنا المفروض نحافظ علي نفسينا منهم
مش العكس
وعجبي عليكي يابلدي

والحمدلله ان الوباء مطلعش وباء ولاحاجه وان انفلونزا العاديه اصعب من انفلونزا الخنازير
لااما بجد كانت تبقي مصيبه